Boks 2028-nji ýylda Los-Anjelesde geçiriljek tomusky Olimpiýa oýunlarynyň programmasyna resmi taýdan goşuldy. Çözgüt Halkara olimpiýa komitetiniň (HOK) Kosta-Nawarinoda (Gresiýa) geçirilen 144-nji sessiýasynda kabul edildi.
2022-nji ýylyň fewral aýynda Oýunlaryň programmasy tassyklananda Halkara boks assosiasiýasy (IBA) bilen düşünişmezlik sebäpli boks oňa goşulmandy. Mundan öň, 2019-njy ýylda HOK dolandyryş, maliýe meselelerini çözüp bilmändigi sebäpli, IBA-nyň olimpiýa hereketinde agzalygyny bes etdi.
2023-nji ýylda HOK-yň nobatdan daşary sessiýasynyň wekilleri russiýaly Umar Kremlewiň ýolbaşçylygyndaky IBA-nyň ykrar edilmegini bes etmek üçin ses berdi.
IBA 2020-nji ýylda Tokioda we 2024-nji ýylda Parižde geçirilen Olimpiýa oýunlarynda boks guramak işlerine gatnaşmady, şeýle-de Oýunlar-2028-e hem gatnaşmaz. Boks ýaryşlaryny guramak we geçirmek wezipelerini HOK öz üstüne aldy. 2025-nji ýylyň fewral aýynda komitet boksy dünýä derejesinde dolandyrmak üçin World Boxing federasiýasyny wagtlaýyn ykrar etdi. HOK-yň belleýşi ýaly, täze gurama bäş yklymdan 78 milli federasiýa girýär.
Şeýlelikde, boks täze ýolbaşçylyk bilen Olimpiada gaýdyp geler. Los-Anjelesdäki Oýunlar 14 – 30-njy iýulda geçiriler.
