Geçen ýyl Bentley-niň operasion girdejisi 373 million ýewro boldy. Bu öňki ýyl bilen deňeşdirilende 37% az. Bäsdeşleriň köpelmegi Bentley-niň girdejisine täsir etdi. Kompaniýanyň umumy girdejisi hem 10% pese düşdi we 2,7 milliard ýewro boldy diýip, «Reuters» neşiri habar berýär.
Bentley-niň ýolbaşçylary ýagdaýy düzetmegiň ýollaryny gözleýärler. Emma kompaniýanyň maliýe müdiri Ýan-Henrik Lafrens bu mesele barada aşa aç-açan gürledi. Onuň aýtmagyna görä, «iň soňunda bu ýagdaýyň jogapkärçiligi müşderileriň egnine ýüklener».
Bentley indi satylan awtoulaglaryň sanyny mälim etmezlik kararyna geldi. Kompaniýa munuň sebäbini düşündirmedi. Emma kompaniýanyň baş direktory Frank-Şteffen Wallizer brendiň strategiýasyny düşündirdi. Onuň pikirine görä, Bentley üçin iň esasy zat – näçe sany awtoulagyň satylýandygy däl-de, her bir ulagyň bahasydyr. Şu nukdaýnazardan seredilende, kompaniýanyň ýagdaýy gowy. Sebäbi her bir awtoulagdan alnan girdeji 2023-nji ýyl bilen deňeşdirilende 10% artdy, bu bolsa täze rekorddyr.
Bu üstünlik, esasan, baý müşderileriň şahsylaşdyrylan (kastomizirlenen) awtoulaglara köp maýa goýmagy bilen baglanyşyklydyr.
Mysal üçin, golaýda Bentley bir müşderisi üçin ýörite taýýarlanan eksklýuziw kupesini görkezdi. Bu ulag özboluşly «Black Rose» reňki bilen boýalan. Üstesine-de, ol 18 karatlyk gülgüne altyn bilen bezelen. Şeýle aýratynlyklara eýe iki gapyly awtoulagyň bahasy 1,65 million funt sterlingden az däldir.
