Bentley britan lýuks awtoulag öndürijisi «Mulliner Batur» atly eksklýuziw kupesini ilkinji gezek 2022-nji ýylyň tomsunda hödürläpdi. Bu ulagdan öndüriljek 18 nusganyň ählisi, eýýäm, şol wagt öňünden sargyt edilipdi. Olaryň bahasy 2,13 million dollardan başlaýardy. Häzirki wagtda hem bu modelleriň önümçiligi dowam edýär. Ýakyn wagtda bolsa, kompaniýa bir müşderisi üçin ýörite taýýarlanan nusgasyny görkezdi. Bu ulag müşderiniň islegine görä, «Black Rose» (Gara gül) diýlip atlandyryldy diýip, «Forbes» neşiri habar berýär.
«Bentley Mulliner Batur Black Rose» – ruly sag tarapda ýerleşýän mini seriýadaky üç kupeden biridir. Müşderiniň islegine laýyklykda, onuň daşky we içki bezeginde gyzyl altyn esasy tema hökmünde ulanylypdyr. Mulliner awtobezeg ussahanasy bu ulagyň kuzowy üçin, ýörite «Black Rose» atly öwüşgüni işläp taýýarlapdyr. Bu reňk Beluga atly gara üçek bilen sazlaşykly utgaşýar. Şeýle-de ulagyň radiator gözenegi, bamperiň bölekleri, kapoty, aýnalaryň korpuslary, 22 dýuýmlyk tigirleri we birnäçe ownuk detallary hem «Satin Rose Gold» (ýalpyldamaýan gyzyl altyn) reňk bilen bezelipdir.
Şol bir reňk shemasy onuň içki bezeginde hem ulanylypdyr. Ulagyň salony deri, twid we şpon (agaç) bilen örtülen. Mundan başga-da, interýeriň bezeginde 18 karatlyk hakyky gyzyl altynyň 210 gramy ulanylypdyr. Gymmat bahaly materialdan 3D çap usuly arkaly, merkezi konsoldaky sürüjilik režiminiň selektory, gurallar panelindäki dolandyryş düwmeleri we rulyň içindäki bezegler ýasalypdyr.
«Mulliner Batur» modelleriniň ählisiniňem tehniki häsiýetleri birmeňzeşdir. Olar 750 at güýjüni öndürýän we 1000 Nm tork berýän 6 litrlik W12 hereketlendiriji bilen üpjün edilýär. Awtoulagda 8 basgançakly awtomat geçiriş gutusy (karobka) we doly herekete getiriji ulgam bar. «Batur» modeli bir wagtlar Bentley-iň taryhyndaky iň güýçli ýol ulagy hasaplanýardy, ýöne geçen tomus bu derejäni 782 at güýji bolan täze nesil «Continental GT» modeli eýeledi.
