23-nji martda Şanhaýyň ýaryş ýolunda 2025-nji ýylyň “Formula-1” dünýä çempionatynyň ikinji tapgyry tamamlandy. Ýaryşyň ýeňijisi “Maklaren” toparynyň sürüjisi awstraliýaly Oskar Piastri (56 aýlaw) boldy.
Pellehana ikinji bolup onuň topardaşy Lando Norris (+9.748) geldi. Öňdebaryjylaryň üçlügini “Mersedesden” Jorj Rassell (+11.097) jemledi.
Dördünji orny “Red Bulluň” sürüjisi Maks Werstappen, bäşinji orny “Ferrariden” Şarl Lekler eýeledi.
Bu “Maklaren” üçin täze möwsümde yzygider ikinji ýeňişdir. Mundan öňki Awstraliýanyň Gran-prisi ýaryşynda Lando Norris ýeňiji bolupdy.
Ýaryş çaknyşyksyz geçmedi: Şarl Lekler (Ferrari) ýaryşyň başynda öz topardaşy Lýuis Hemilton bilen çaknyşyp, bolidiň öň bölegine zeper ýetirdi. Fernando Alonso (Aston Martin) tormoz ulgamy bilen bagly näsazlyk sebäpli ýaryşa gatnaşmagyny bes etdi.
Belläp geçsek, ýedi gezek dünýä çempiony Hemilton düýn Hytaýyň Gran-prisiniň çäklerinde geçirilen sprint ýaryşynda ýeňiji bolup, täze topary “Ferrari” üçin ilkinji ýeňşi getirdi. Şeýle-de, üçlüge Oskar Piastri we häzirki çempion Maks Werstappen girdi.
