Donatella Wersaçe 2025-nji ýylyň halkara «Woolmark Prize» baýragynyň emin agzalarynyň ýolbaşçylygyna saýlandy. Emin agzalarynyň hatarynda Zegna-nyň baş döredijilik müdiri Alessandro Sartori, Off-White-yň sungat müdiri Ib Kamara, şeýle-de Alessandro Del Akwa we Daniel Goldberg bar. Bu barada «WWD» habar berýär.
Eminleriň hataryna mundan başga-da Rupal Patel, Şineýd Býork, suratkeş Hani Dižon, moda synçysy Tim Blenks we «Vanity Fair» žurnalynyň redaksiýa ýolbaşçysy Simona Marketti hem goşular. Baýrak ugrunda bäsleşýän finalistleriň arasynda Dýuran Lantink, Raul Lopes, Reýçel Skott, Maýkl Stýuart, Lui-Gabriel Noçi, Ester Manas, Baltazar Delepýer we Merill Rogge dagy bar.
«Moda dünýäsinde täze nesil zehinleri goldamak häzirki wagtda öňküsindenem has möhüm. Woolmark baýragynyň [gowşurylyş dabarasynyň] biziň öz şäherimiz Milanda geçiriljekdigine we ýaş dizaýnerler bilen duşuşjakdygyma diýseň begenýän. Olaryň hemmesiniň öz ýolunda ýeňiji boljakdygyna ynanýaryn» — diýip, Donatella belläp geçdi.
