Microsoft korporasiýasy Windows 10-yň ulanyjylaryna 2025-nji ýylyň 14-nji oktýabrynda bu operasion ulgamyň goldawynyň bes ediljekdigi barada hat iberip başlady. Bu barada «TechRadar» neşiri habar berýär.
Bu şol seneden soň Windows 10 bilen işleýän kompýuterleriň howpsuzlyk täzelenmelerini almajakdygyny aňladýar. Howpsuzlyk täzelenmeleri bolmasa, kompýuter wiruslardan we haker hüjümlerinden goragsyz galýar. Şeýle-de käbir programmalar hem işlemegini bes edip biler.
Microsoft ugradylan hatlarda herekete geçmegiň wagtynyň gelendigini ýatladýar. Kompaniýa kompýuteriňiziň Windows 11-e mugt täzelenmäge laýyklygyny barlamagy maslahat berýär. Hatda muny anyklamak üçin ýörite link hem berilýär. Eger-de kompýuteriňiz Windows 11-i goldamasa, onda Microsoft size Windows 11 bilen enjamlaşdyrylan täze kompýuter satyn almagy maslahat berýär.
Aslynda, köp ulanyjy Windows 10 üçin goldawyň bes ediljekdigini eýýämden bilýär, sebäbi bu barada duýduryşlar operasion ulgamynda hem görkezilýär. Emma Microsoft bu hat arkaly, ulanyjylara «köne wersiýada galyp, howp astynda bolmaň» diýmek isleýär.
Nähili bolsa-da, Microsoft ähli ulanyjylaryň mümkin boldugyça çalt Windows 11-e geçmegini isleýändigini aç-açan görkezýär.
