Netflix Willi Wonka baradaky hekaýatdan ylham alan “Altyn petek” realiti-şouwynyň düşürilmegine rugsat berdi. Striming gysga tizer bilen kastingiň başlanandygyny habar berdi.
Bu “Çarli we şokolad fabrikasynyň” äheňinde döredilen ilkinji realiti-şou bolar. Onuň gysgaça beýanyna görä, altyn petegi tapan oýunçylar Wonkanyň şokolad fabrikasyna girmäge mümkinçilik alar. Mundan öň olar synaglardan geçmeli bolar.
“Altyn petegi” döredijiler çylşyrymly saýlawlar we töwekgelçilikler bilen täsirli sosial tejribesini wada berýär. Olar retrofuturistik fantastiki landşaftda bolup geçer.
“Bu başdangeçirmeleri, strategiýalary we sosial dinamikany öz içine alýan özboluşly realiti-şou bir wagtyň özünde hem gyzykly, hem garaşylmadyk boljak tejribäni döredýär. Ilkinji gezek az sanly bagty çüwenler diňe bir tejribäni göz öňüne getirmän, eýsem fabrikanyň içine girip, ony başdan geçirip biler” – diýip, Netflix-de Unscripted bölümçesiniň prezidenti Jeff Gaspin belledi.
“Altyn petegi” döretmek bilen Netflix we Eureka studiýalary meşgullanar. Bu işe 2023-nji ýylyň “Wonka” filminden kadrlary ulanmak üçin Warner Bros. kompaniýalarynyň biri hem goşular diýlip garaşylypdy, ýöne anonsda bu barada aýdylmaýar diýip, Deadline belleýär.
Netflix Roald Dahl Company üçin hukugy 2021-nji ýylda satyn aldy. Bu kompaniýa Willi Wonka baradaky powestiň awtory Roald Dalyň eserlerine bolan hukuga eýeçilik edýär.
