Google kompaniýasy bulut howpsuzlygy boýunça ýöriteleşen Wiz atly startapy satyn alýandygyny resmi taýdan habar berdi. Geleşigiň bahasy 32 milliard dollar bolup, töleg nagt görnüşde amala aşyrylar. Bu satyn alyş Google-yň taryhyndaky iň uly geleşik bolar diýip, «TechCrunch» neşiri ýazýar.
Wiz garaşsyz platforma bolmagynda galar we diňe Google Cloud bilen çäklenmän, eýsem ähli bulut hyzmatlaryny üpjün edijiler bilen işleşer. Resmi däl maglumatlara görä, häzirki wagtda Wiz-iň ýyllyk girdejisi, takmynan, 700 million dollar.
Häzirki wagta çenli tehnoägirt tarapyndan amala aşyrylan iň uly satyn alyş 2011-nji ýylda bolupdy. Şol ýyl Google Motorola Mobility kompaniýasyny 12,5 milliard dollara satyn alypdy.
Resmi däl maglumatlara görä, Google geçen ýyl Wiz-i satyn almak üçin 23 milliard dollar teklip edipdir, emma gepleşikler netije bermändir.
Google Wiz-i satyn almak bilen, bulut hyzmatlaryndaky ornuny berkitmegi maksat edinýär. Häzirki wagtda bu ugurda kompaniýa AWS we Microsoft Azure ýaly bäsdeşlerinden yza galýar. Şeýle-de howpsuzlyk çözgütleri boýunça Google-da birnäçe önüm bar bolsa-da, olaryň hiç birem Wiz-iň gerimi bilen deňeşdirerlik däl. Wiz-iň işi çalt depginde ösýär: geçen ýyl kompaniýanyň girdejisi 500 million dollardan geçdi we şu ýyl onuň iki esse artmagyna, ýagny 1 milliard dollara ýetmegine garaşylýar.
