Jonatan Anderson Loewe-niň döredijilik müdiri wezipesinden aýrylýar. Ol bu moda öýüne 11 ýyl bäri ýolbaşçylyk edip gelýärdi diýip, «WWD» habar berýär.
«Loewe-de işlän ilkinji günümden başlap, men dizaýn studiýasynda we atelýede öz pikirdeşlerimi tapdym, olaryň zehinleri şol wagtam, häzirem deňsiz-taýsyz. Yzyma seredip, bir zada akyl ýetirdim: brend ilkinji görkezilişde ýa-da ilkinji ýylynda döremeýär, ol tapgyrlaýyn gurulýar, möwsümme-möwsüm, ýylba-ýyldan brendiň öz dogry ugry esasynda kemala gelýär» — diýip, Anderson sosial torlarynda ýazdy.
Şeýle-de ol Loewe-däki iň uly üstünlikleriniň biri hökmünde, «Craft Prize» baýragyny ýola goýandygyny belledi. Ol gaznanyň işgärlerine, emin agzalaryna we hünärmenlerine eden yhlaslary hem-de sarp eden gymmatly wagtlary üçin minnetdarlyk bildirdi.
Brend Andersonyň indiki ädimi we onuň ýerine kimiň geçjekdigi barada häzirlikçe resmi maglumat bermedi. Loewe-niň ýolbaşçylygyna Proenza Schouler-iň öňki döredijilik müdirleri – ýanwar aýynda Nýu-Ýorkdaky brendlerinden aýrylan Jek Makkalou we Lazaro Ernandes geçip biler diýlip çaklanylýar.
