«Time Out» žurnaly dünýäniň iň gowy gastronomiki şäherleriniň reýtingini hödürledi. Bu reýtingde birinji orny ABŞ-nyň Luiziana ştatynda ýerleşýän Täze Orlean şäheri eýeledi.
Soragnama 18,5 müňden gowrak adam gatnaşdy. Gatnaşyjylar Täze Orleanyň fransuz, ispan, wýetnam we afrika aşhanalarynyň özboluşly garyndysy barada aýratyn belläp geçdiler. Şäheriň iň meşhur tagamlary hökmünde gambo, jambalaýa we binetler görkezildi.
Ikinji orny Bangkok şäheri (Tailand) eýeledi. Bu şäherde Mişlen ýyldyzy bilen sylaglanan kaşaň restoranlardan başlap, bahasy bary-ýogy 3 dollar bolan meşhur köçe tagamlaryna çenli dürli görnüşler bar.
Üçünji orny Kolumbiýa Respublikasynyň Medelin şäheri eýeledi. Ol soragnama gatnaşyjylary arzan bahaly we ýokary hilli kofesi bilen haýran galdyrypdyr.
Dördünji orunda bolsa, Günorta Afrikanyň (GAR) Keýptaun şäheri ýerleşdi. Bu şäheriň kenarýaka naharlary, esasanam deňiz önümleri soragnama gatnaşyjylaryň ünsüni özüne çekipdir.
Sanawyň indiki orunlarynda dürli we üýtgeşik täze aşhanalary bilen Madrid hem-de soňky ýyllarda halkara gurmanlar üçin esasy ugurlaryň birine öwrülen Mehiko şäheri ýerleşýär.
Ilkinji 10-luga giren beýleki şäherler: Lagos, Şanhaý, Pariž we Jakarta. Şeýle-de ilkinji 20-lige girenler: Marrakeş, Lima, Er-Riýad, Mumbai, Abu-Dabi, Portu, Monreal, Neapol we San-Hose.
