Huawei kompaniýasynyň HarmonyOS operasion ulgamy Hytaý bazarynda iOS-den öňe geçdi. «Counterpoint Research-yň» maglumatlaryna görä, HarmonyOS bazaryň 19%-ini eýeleýär, bu iOS bilen deňeşdirilende 2% köpdür.
Android ulgamy bolsa henizem Hytaý bazarynda agdyklyk edýär. 2024-nji ýylyň dördünji çärýeginde Android 64% bazar paýyna eýe boldy. Huawei hem Hytaýyň smartfon bazarynda öňdeligi eýeläp, şol döwürde 18,1%-lik paý aldy.
Çaklamalara görä, hökümetiň kömeginiň netijesinde HarmonyOS ulgamynyň meşhurlygy has-da artyp biler. Hytaý hökümeti ykdysadyýeti goldamak maksady bilen, bahasy 6 müň ýuana (800 dollara) çenli bolan smartfonlary satyn alýanlara 500 ýuan (70 dollar) möçberinde kömek berýär.
Emma dünýä derejesinde ýagdaýlar başgaça: Android 74% bazar paýy bilen öňdebaryjylygyny saklap galýar. Apple bolsa 2024-nji ýylyň dördünji çärýeginde bazardaky paýyny 16%-den 22%-e çenli artdyrdy. Huawei-niň global bazardaky paýy bolsa üýtgemän, 4% derejesinde galdy. Şeýle-de bolsa, kompaniýanyň Hytaýda gazanan üstünligi onuň geljekde dünýä bazaryndaky görkezijilerine oňyn täsir edip biler.
