Google kompaniýasy Platform Stability tapgyryna ýeten Android 16 Beta 3-i çykardy. Bu indi ähli programma interfeýsleriniň (API) gutarnykly berkidilendigini we işläp düzüjileriň programmalary üýtgeşme töwekgelçiligi bolmazdan adaptirläp biljekdigini aňladýar. Täzelenme täze howpsuzlyk, elýeterlilik we energiýa tygşytlylygy funksiýalaryny hem öz içine alýar.
Google-iň meýilnamasyna görä, aprel aýynda ýene bir ýalňyşlyklary düzetjek täzelenme çykar, Android 16-nyň ahyrky wersiýasyna bolsa 2025-nji ýylyň ikinji çärýeginde garaşylýar. Soňky birnäçe ýylda ilkinji gezek kompaniýa relizleriň shemasyny üýtgetdi: dördünji çärýekde täze wersiýanyň deregine kiçiräk täzelenme çykar.
Şeýle-de, kompaniýa Android 16-nyň mümkin boldugyndan has köp enjamlary gurşap almagy üçin hyzmatdaşlar bilen işleşýändigini aýtdy.
Täze funksiýalar
Beta 3 eşidiş enjamlary üçin Bluetooth LE arkaly ses geçiriş tehnologiýasyny – Auracast goldawyny goşdy. Eşitmekde kynçylyk çekýän adamlar gönüden-göni Android 16 gurluşlaryna birigip biler. Şeýle-de, görşi gowşak bolan ulanyjylar üçin okamagy aňsatlaşdyrýan kontur tekst funksiýasy peýda boldy.
Energiýa tygşytlylygy
Pixel smartfonlarynyň eýelerine akkumulýatoryň ýagdaýyny yzarlamaga mümkinçilik berýän Battery Health sahypasy goşuldy. Ol akkumulýatoryň galan sygymyny we onuň hyzmat ediş möhletini uzaltmak boýunça teklipleri görkezýär. Teklipler şu aşakdakylary öz içine alýar:
- ·Programma üpjünçiligini täzelemek;
- ·Adaptiw zarýad berijini işjeňleşdirmek;
- ·Aşa temperaturalardan gaça durmak.
Interfeýs we habarnamalar
Sazlamalar menýusy täzelendi. Täze dizaýn goşmaça menýu elementlerini Material You stilindäki kartoçkalara ýerleşdirýär. Bu interfeýsi has düşnükli we tertipli edýär.
Goşmaça menýularyň sözbaşylary ekranyň iň ýokarsyna, yza gaýdyş düwmesiniň gapdalyna geçirildi. Bu ekranda ýeri tygşytlamaga we has köp sazlamalary görkezmäge mümkinçilik berýär.
Ýene bir uly bolmadyk, ýöne göze ilýän üýtgeşme – soňky programmalar menýusynda programma nyşanyna basanyňda täze “Close” opsiýasynyň peýda bolmagydyr. Bu programmany ýapmak üçin adaty ýokary aýryp goýbermek ýaly bir zat bolup, onuň işleýşi hem birmeňzeş – ol programmanyň işini doly togtatmaýar-da, ony ýönekeý ýapýar.
Beta 3 kodunda meňzeş habarnamalary bir topara jemläp, olaryň gysgaça beýanyny düzjek Summarized Notifications funksiýasy tapyldy.
Android 16 Beta 3 Pixel 6 we has täze smartfonlar üçin elýeterlidir.
