DeepSeek taslamasy Hytaýda milli gymmatlyk hökmünde ykrar edildi we berk gorag astyna alyndy. «The Information» neşiriniň habaryna görä, hökümetiň görkezmesi bilen kompaniýanyň ýolbaşçylary esasy işgärlere daşary ýurt (biometriki) pasportlaryny tabşyrmagy tabşyrdy.
Bu çäreler «täjirçilik ýa-da hatda döwlet syry bolup biljek gizlin maglumatlaryň» daşyna çykmagynyň öňüni almak üçin görüldi.
«DeepSeek-iň administrasiýasy syýahat çäklendirmeleriniň berjaý edilmegini üpjün edýär, onuň enelik kompaniýasy (High-Flyer hej-fondy) ony käbir işgärleriniň pasportlaryny saklamaga mejbur edýär. Bu wakalar Hytaý hökümetiniň emeli aň ugrunda işleýän alymlara we telekeçilere täjirçilik syrlarynyň syzmagyndan howatyrlanyp, ABŞ-a syýahat etmekden gaça durmagy tabşyrmagyndan birnäçe hepde soň ýüze çykyp başlady» — diýip, «The Information» neşiri ýazýar.
«Bloomberg» neşiriniň ýazmagyna görä, DeepSeek-iň meşhurlygynyň artmagy Hytaýyň gazna bazaryna bolan gyzyklanmany güýçlendirdi. Esasan hem tehnologiýa pudagyndaky kompaniýalaryň paýnamalary ýokarlandy. Soňky bir aýyň dowamynda, Hytaýyň gazna bazaryna uly hej-fondlary hem öz içine alýan maýadarlardan, takmynan, 1,3 trillion dollar möçberinde täze maýa çekildi.
DeepSeek modeli eýýämden «China Mobile», «China Telecom», «China Unicom», «Lenovo», «Tencent» we «Kingdee» ýaly iri kompaniýalaryň önümlerine ornaşdyryldy.
DeepSeek-iň «Gizlinlik syýasatyna» (Privacy Policy) we «Ulanyş düzgünlerine» (Terms of Use) görä, bu emeli aň ulgamy ulanyjylaryň maglumatlaryny Hytaýdaky serwerlerinde jemleýär, saklaýar we işläp taýýarlaýar. Bu maglumatlara IP adresleri, brauzeriň we enjamyň maglumatlary, cookie-faýllar, näsazlyk hasabatlary, öndürijilik ýazgylary, operasion ulgam baradaky maglumatlar, klawiaturada basylýan klawişler we ulgamyň dili girýär. Hasabyň pozulmagy ulanyjylaryň maglumatlarynyň düýbünden öçüriljekdigine kepil geçmeýär.
