16-njy martda Londonyň “Uembli” stadionynda Liganyň kubogynyň final oýny geçirildi. “Nýukasl Ýunaýted” 2:1 hasabynda “Liwerpuly” utdy. Şeýlelikde, topar soňky 70 ýylda Angliýada ilkinji uly kubogyny gazandy.
Oýunda ilkinji goly 45-nji minutda “Nýukaslyň” goragçysy Den Býorn saldy. 53-nji minutda hüjümçi Aleksander Isak artykmaçlygy iki gola ýetirdi. “Liwerpulyň” hüjümçisi Federiko Kýeza tapawudy diňe oýna goşulan wagtda (90+4) azaltdy.
Ýarym finalda “Liwerpul” “Tottenhemi” (iki oýnuň jemi boýunça 4:1), “Nýukasl” bolsa “Arsenaly” (4:0) utdy.
Mundan öň “Nýukasl” Liganyň kubogynyň finalyna çykypdy (1976, 2023), ýöne utmak başartmady. Ol soňky uly kubogyny 1955-nji ýylda gazandy – bu Angliýanyň kubogy boldy. 2017-nji ýylda topar Çempionşipde, 2006-njy ýylda bolsa Intertoto kubogynda ýeňiji boldy.
Ýaryşda ýeňiş sany boýunça rekord eýesi “Liwerpul” bolmagynda galýar (10 titul), ol soňky ýeňşini 2024-nji ýylda gazandy.
