Ýaponiyada dünýäde ilkinji 3D-printerde çap edilen demir ýol stansiýasynyň gurluşygyna başlandy. Bu taslamany «West Japan Railway» bilen binalary 3D çap etmek boýunça ýöriteleşen «Serendix Inc.» kompaniýasy bilelikde amala aşyrýarlar diýip, «The Japan News» neşiri habar berýär.
Täze Hatsusima stansiýasy Wakaýama prefekturasyndaky Kiseý demir ýol ugrunda gurlar.
Bekediň binasy bir gatly bolar, şeýle-de onuň uzynlygy 6,3 metr, giňligi 2,1 metr we beýikligi bolsa 2,6 metr bolar. Meýdany, takmynan, 10 inedördül metr boljak bu kiçi stansiýa betondan gurlar.
Gurluşyk iki tapgyrda amala aşyrylar. Ilki bilen, stansiýanyň bölekleri «Serendix Inc.» kompaniýasynyň Hego prefekturasyndaky zawodynda 3D-printerde çap ediler. Soňra şol bölekler gurluşygyň alnyp baryljak ýerine eltilip, kranyň kömegi bilen birikdiriler. Birikdiriş işleri 25-nji martdan 26-njy marta geçilýän gije, otlularyň gatnawy tamamlanandan soň amala aşyrylar. Bu işler, takmynan, alty sagat dowam eder.
Bu taslama 3D çap edilen desgalaryň duzly deňiz howasyna bolan durnuklylygyny, şeýle hem gurluşyk we hyzmat çykdajylaryny öwrenmäge mümkinçilik berer.
«Eger-de taslama üstünlikli bolsa, biz bu tehnologiýany beýleki [demir ýol] duralgalarynda-da ulanmagy göz öňünde tutarys» — diýip, «West Japan Railway» kompaniýasy belledi.
