Audi kompaniýasy tygşytlylyk maksatnamasynyň çäklerinde 2030-njy ýyla çenli, takmynan, 9 müň iş ornuny azaltmagy meýilleşdirýär. Focus žurnalynyň maglumatlaryna görä, önümçilik geňeşi bu çärelere garşy çykýar.
Kompaniýanyň baş direktory Gernot Dellner kompaniýanyň girdejililigini ýokarlandyrmak üçin çykdajylary azaltmak isleýär. Işden çykarma tehniki bölüme hem täsir eder.
Bu çäreler konserne 1 mlrd ýewrodan gowrak tygşytlamaga mümkinçilik berer, materiallar üçin çykdajylar bolsa 8 mlrd ýewro azalmaly.
Mundan başga-da, Audi aýlyk haklaryny azaltmagy, goşmaça tölegleri aýyrmagy hem-de iýmit we tehniki hyzmatlar ýaly käbir iş ugurlaryny başga bir kompaniýa geçirmegi (autsorsing) meýilleşdirýär.
Awtoöndüriji satuwlaryň gijikdirilmegi we azalmagy sebäpli kynçylyklar bilen ýüzbe-ýüz bolýar. Geçen ýyl topar boýunça satuw möçberi tas 12% peseldi. Germaniýada pese gaçyş 21,3%, Demirgazyk Amerikada 12,7%, Hytaýda 10,9% boldy. Dünýä bazarynda Audi 650 müň töweregi ulag satdy – bu bir ýyl ozalkydan 80 müň birlik azdyr.
Işden çykarmak çäreleri müdirler geňeşinde nägilelik döredýär. Audi “kompaniýanyň has ykjam, netijeli we çeýe bolmagynyň” işgärler üçin çykdajylary azaltmagy talap edýändigini belledi.
