15-nji martda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti O.Atabaýewa Gaznanyň müdiriýetiniň agzalarynyň gatnaşmagynda müdiriýetiň mejlisini geçirdi. Onuň gün tertibine Gaznanyň döredilmeginiň dört ýyllygy mynasybetli geçiriljek çäreleriň guramaçylygyna degişli meseleler girizildi diýlip, “Watan” habarlar gepleşiginde habar berildi.
Mejlisde Gaznanyň türkmen halkynyň milli ruhuna kybap gelýän ynsanperwer ýörelgelerini mundan beýläk-de ösdürmek we bu ugurda dünýä ýurtlary bilen özara tejribe alyşmak meselelerine zerur üns berilmelidigi barada aýdyldy.
Munuň özi paýhasly pederlerimiziň taryhyň dowamynda döreden asylly ýörelgeleriniň häzirki döwürde işjeň ösdürilmeginde we sogap işleriň dünýä derejesinde wagyz edilmeginde ähmiýetlidigini belläp, Gaznanyň bejeriş işleri boýunça wise-prezidenti O.Atabaýewa bu ugurda alnyp barylýan işleriň netijeliligini artdyrmak babatda birnäçe maslahatlaryny berdi.
Gaznanyň döredilmeginiň dört ýyllygy mynasybetli geçiriljek çärelerde halkymyzyň asyrlar aşyp gelýän ynsanperwer ýörelgeleriniň rowaçlyklara beslenýändiginiň öz beýanyny tapmalydygy nygtaldy.
