15-nji martda Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti O.Atabaýewan Birleşen Milletler Guramasynyň Çagalar Gaznasynyň (ÝUNISEF) Türkmenistandaky wekili Jalpa Ratna bilen duşuşdy. Bu barada “Watan” habarlar gepleşiginde habar berildi.
Duşuşygyň barşynda Türkmenistan bilen ÝUNISEF-niň arasyndaky gatnaşyklaryň häzirki ýagdaýy we ony ösdürmegiň geljekki ugurlary ara alnyp maslahatlaşyldy.
Bilelikde amala aşyrylýan işleriň oňyn netije berýändigi bellenildi.
Hanym Jalpa Ratna Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň türkmen halkynyň Milli Lideriniň tagallasy bilen alyp barýan ynsanperwer işleriniň dünýä nusgalykdygyny belledi.
Şeýle hem duşuşygyň dowamynda Gaznanyň döredilenine dört ýyl bolýandygy, şu döwürde Gazna tarapyndan dünýäniň dürli ýurtlarynyň heläkçilik zerarly ejir çeken çagalaryna kömek-goldawlaryň ugradylandygy, şeýle hem ýurdumyzda köpsanly mätäç çagalaryň Gaznanyň hasabyna bejergi alandygy barada aýdyldy.
Ynsanperwerlik ýörelgelerini esasy ugur edinýän Gaznanyň 4 ýyllygy mynasybetli giň möçberli çäreleriň geçirilmeginiň meýilleşdirilýändigi barada aýdyp, Gaznanyň wise-prezidenti bu dabaralara ÝUNISEF-niň Türkmenistandaky wekilhanasynyň ýolbaşçylaryny hem-de agzalaryny gatnaşmaga çagyrdy.
