Sony kompaniýasy mini-LED we OLED tehnologiýalarynyň iň gowy aýratynlyklaryny özünde jemleýän täze yşyklandyryş ulgamyny – General RGB LED Backlight tehnologiýasyny tanyşdyrdy diýip, «The Verge» neşiri habar berýär.
General RGB LED Backlight tehnologiýasynyň esasynda aýratyn gyzyl, ýaşyl we gök (RGB) LED-ler ulanylýar we olar goşmaça reňk süzgüçlerinden geçmän, gönüden-göni LCD paneliň piksellerini ýagtylandyrýar.
Täze yşyklandyryş ulgamy aşakdaky artykmaçlyklary hödürleýär:
- 4000 kd/m² çenli iň ýokary ýagtylyk derejesi, bu mini-LED ekranlardan iki esse diýen ýaly ýokarydyr;
- 99% DCI-P3 we 90% BT.2020 reňk giňişligini öz içine alýar;
- 66-bit dolandyryş ulgamy, ýagtylygyň we reňkleriň has takyk sazlanmagyny üpjün edýär;
- adaty QLED-lere garanyňda 4 esse köp reňk göwrümi, has gowy kontrastdaky we has doýgun gara reňkleri görkezip bilýär;
- görüş burçuny giňeldýär, ýagny islendik burçdan seredilende-de reňkleriň ýoýulmagyny azaldýar;
- 100 dýuýmdan hem uly ekranlary has elýeterli bahadan öndürmäge mümkinçilik döredýär.
Sony täze tehnologiýasyny Tokiodaky ýapyk tanyşdyrylyş dabarasynda Bravia 9 flagman telewizory bilen deňeşdirdi. Žurnalistleriň bellemegine görä, RGB LED-iň prototipi has ýokary reňk doýgunlygyny, kontrasty we şekil hilini üpjün edipdir. Şeýle-de onuň ekrany şöhlelenmä garşy täsirli örtük (anti-reflective screen) bilen enjamlaşdyrylan eken.
Şeýle-de bolsa, RGB LED düşünjesiniň täze däldigini bellemek gerek. Sony kompaniýasy 2004-nji ýylda-da RGB LED-li LCD telewizorlary işläp taýýarlapdy. Samsung we TCL kompaniýalary hem «CES 2025» sergisinde RGB yşyklandyryşly mini-LED telewizorlarynyň prototiplerini görkezipdiler. Şeýle-de Hisense kompaniýasy-da şu ýylyň ahyrynda satuwa çykarylmagy meýilleşdirilýän «hakyky RGB modelini» tanyşdyrypdy.
Sony telewizorlaryň we displeýleriň köpçülikleýin önümçiligine 2025-nji ýylda başlamagy meýilleşdirýändiklerini aýtdy. Şol bir wagtyň özünde, tanyşdyrylyş dabarasynda žurnalistlere munuň «2026-njy ýylyň tehnologiýasydygy» aýdylansoň, täze tehnologiýa esaslanýan önümleriň bazarda 2027-nji ýylda elýeterli bolup biljekdigi hem çaklanylýar.
