Netflix “elhençlikler şasy” eserine esaslanan täze filmiň üstünde işlemäge girişýär. Akym hyzmaty Stiwen Kingiň “Kujo” romanyny ekranlaşdyrýar.
Taslamanyň prodýuserligine Roý Li bellendi diýip, Deadline habar berýär.
“Kujo” guduz itden goranmak üçin awtoulagynda gulplanan bir aýal bilen ogly barada gürrüň berýär. Eser ilkinji gezek 1983-nji ýylda ekranlaşdyrylypdy. Film 6 million dollar (hümmetsizlenmäni hasaba almazdan) býujet bilen dünýä prokatynda 21 million dollar gazandy.
Ondan öň Kingiň eserleri esasynda “Şouşenkodan gaçyşlyk”, “Ýaşyl milýa”, “Ýalkym”, “Kerri”, “Ýanymda gal”, “Ol” we “Ylgap barýan adam” ýaly filmler surata düşürilipdi. Režissýor Edgar Raýt häzirki wagtda Kolman Domingonyň, Glen Pauelliň we Joş Broliniň baş keşpleri ýerine ýetirmeginde “Ylgap barýan adam” atly anti utopiýa boýewigini täzeden ekranlaşdyrmagyň üstünde işleýär. 1987-nji ýyldaky film uýgunlaşmasynda baş keşbi Arnold Şwarsenegger janlandyrypdy. Mundan başga-da, häzirki wagtda ýazyjynyň adybir hekaýasyna esaslanýan “Maýmyn” horrory bütin dünýäde görkezilýär.
