Donatella Wersaçe Versace-iň döredijilik müdiri wezipesinden çekilýär. Bu barada Italiýanyň moda öýi sosial ulgamlarda habar berdi.
Indi modelýer brendiň ilçisi bolar.
“Täze wezipesinde hanym Wersaçe özüni Versace-iň haýyr-sahawat başlangyçlaryny goldamaga bagyşlar” – diýlip, habarda aýdylýar.
Donatella wezipeden gidýändigi baradaky habary tassyklady.
“Brendiň baş ilçisi hökmünde täze wezipämde men Versace-iň iň höwesjeň tarapdary bolup galaryn. Versace meniň ganymda hem ýüregimde. Meniň üçin durmuşymda doganym Janniniň mirasyny dolandyrmak uly hormat boldy. Ol hakyky zehindi we men onuň ruhunyň hem tutanýerliliginiň bir bölegi maňa geçendir diýip umyt edýärin” – diýip, ol aýtdy.
Brendiň döredijilik direktory wezipesini 1-nji aprelden Dario Witale eýeleýär. Ol soňky 15 ýyl Miu Miu-da işledi.
Versace – italýan kompaniýasy bolup, egin-eşik, atyr, sagat, öý üçin harytlary, aksessuarlary we beýleki kaşaň predmetleri öndürýär. Moda öýi modelýer we dizaýner Janni Wersaçe tarapyndan 1978-nji ýylda döredildi. 1997-nji ýylda, Versace-iň esaslandyryjysy ýogalandan soň, moda öýüne Janniniň uýasy – Donatella Wersaçe ýolbaşçy boldy. Häzir kompaniýa Capri Holdings-iň düzümine girýär.
