Gucci moda öýi Demna Gwasaliýany täze döredijilik direktory edip belledi. 43 ýaşly gruziýaly dizaýner işine iýul aýynyň başynda girişer diýip, kompaniýanyň sosial torlarynda habar berildi.
Vogue Business-iň maglumatlaryna görä, Gwasaliýa Balenciaga-da on ýyl işläninden soň, 6-njy iýulda ol ýerde soňky moda görkezilişini geçirer. Onuň ornuna kimiň bellenjekdigi bolsa soň yglan ediler.
«Men Gucci maşgalasyna goşulýandygym üçin diýseň begenýän. Çuňňur hormat goýýan we uzak wagt bäri haýran galyp synlap gelýän öýümiň ösüşine goşant goşmak meniň üçin uly mertebe» — diýip, neşir Gwasaliýanyň sözlerini ýetirýär.
Gucci-niň baş direktory Stefano Kantinonyň pikirine görä, Demna «brende üýtgeşik bir zatlar getirer».
«Onuň moda baradaky garaýşy örän täsin we bu hut Gucci-ä gerek zat» — diýip, Kantino belleýär we Gwasaliýany «öz nesliniň iň gowy döredijilik direktorlaryndan biri» hökmünde häsiýetlendirýär.
Gwasaliýa täze wezipesinde fewral aýynda Gucci-ni terk eden Sabato de Sarnonyň ornuna geçer. Döredijilik direktorynyň wezipesiniň boş döwründe, 2025-nji ýylyň güýz-gyş kolleksiýasyny brendiň öz dizaýn býurosy hödürledi.
Balenciaga-daky işinden daşary, Gruziýada doglan Gwasaliýa, Vetements brendiniň esaslandyryjylarynyň biri hökmünde hem tanalýar – Demna we onuň erkek dogany Guram bu brendi 2014-nji ýylda döredipdi. Örän özboluşly moda görkezilişleri we ýokary bahalary bilen tanalýan Vetements, gysga wagtda uly meşhurlyga eýe boldy. Hatda bary-ýogy bir ýyldan soň, käbir žurnallar ony «moda dünýäsindäki iň gyzykly waka» diýip hem atlandyrypdy.
