Sabato de Sarno Gucci moda öýüniň döredijilik müdiri wezipesini terk edýär. Ol bu wezipede bir ýyldan gowrak wagt işledi diýip, The New York Times neşiri ýazýar.
Gucci-niň baş müdiri Stefano Kantino bitiren işleri we brendiň ösüşine goşan goşandy üçin de Sarno minnetdarlyk bildirdi. Onuň ornuny eýelejek hünärmen gijräk belli bolar.
De Sarnonyň ýolbaşçylygynda döredilen soňky kolleksiýa (güýz-gyş 2025) 25-nji fewralda Milanyň moda hepdeliginde görkeziler. Gucci-de de Sarno erkekleriň we zenanlaryň eşiklerini döretmäge, şeýle-de aksessuarlaryň, deri önümleriniň we interýer predmetleriniň dizaýnyna jogapkärdi.
Habar Gucci-niň, şeýle-de Balenciaga, Saint Laurent we McQueen moda öýleriniň baş kompaniýasy Kering-iň 2024-nji ýyl üçin ýyllyk netijelerini yglan etmeginiň öňüsyrasynda peýda boldy. Oktýabr aýynda Kering kompaniýasy Gucci-niň satuwynyň 2024-nji ýylyň üçünji çärýeginde 26% pese gaçandygyny habar berdi, bu holdingiň moda öýleriniň arasynda iň ýaramaz netije we tutuş pudakda iň ýaramaz netijeleriň biri boldy. Ähtimal, ýyllyk görkezijiler hem şeýle depginde bolar.
De Sarno karýerasyna 2005-nji ýylda Prada-da başlady, soňra Dolce & Gabbana-da, 2009-njy ýyldan bolsa Valentino-da işledi.
Ol Gucci-niň döredijilik müdiriniň wezipesini 2023-nji ýylyň ýanwar aýynda eýeläp, Alessandro Mikeleniň ornuny çalyşdy. Gyzykly ýeri, Gucci-de 20 ýyl işlän Mikele 2024-nji ýylda Valentino-nyň döredijilik müdiri boldy.
