Intel täze baş direktoryň bellenendigini habar berdi. Wezipäni asly malaýziýaly telekeçi 65 ýaşly Lip-Bu Tan eýelär. Ol Pet Gelsinger bu wezipeden gidenden üç aýdan soň wagtlaýyn ýolbaşçylary çalşyrar.
Mundan öň Tan 2009-njy ýyldan 2021-nji ýyl aralygynda Cadence kompaniýasyna ýolbaşçylyk etdi, 2022-nji ýyldan bäri bolsa Intel-iň müdirler geňeşiniň düzümine girýärdi.
Geçiş döwründe kompaniýany wagtlaýyn Dewid Zinsner we Mişel Holthaus dolandyrdy. Tan 18-nji martda täze wezipesine girişenden soň, Zinsner kompaniýada maliýa müdiri bolup galar, Holthaus bolsa Intel Products bölümçesinde işlemegini dowam etdirer.
Tanyň eýýäm müdirler geňeşiniň agzasyndan CEO wezipesine geçmekde tejribesi bar, çünki Cadence-de hem şeýle bolupdy. Onuň döwründe kompaniýanyň girdejisi iki esseden gowrak ýokarlandy. Indi Intel-de hem şeýle üstünlige garaşylýar.
Tanyň öňünde Intel-iň strategiýasyny kesgitlemek meselesi durýar: önümçiligi ösdürmek, kompaniýany bölmek ýa-da aktiwleriň bir bölegini satmak.
Soňky ýyllarda Intel uly çökgünlik bilen ýüzbe-ýüz bolýar. Birwagtlar ýarymgeçirijileriň önümçiliginde öňdebaryjylaryň biri bolan kompaniýa 2024-nji ýylda ençeme gezek ýitgi barada habar berdi. Şeýle-de, ol 10 mlrd dollary tygşytlamak üçin işgärleriň 15%-ini işden çykarmak meýilnamalary barada habar berdi. Soňky bir ýylda kompaniýanyň paýnamalary 54% pese gaçdy.
Täze baş direktoryň bellenendigi baradaky habardan soň Intel-iň paýnamalarynyň bahasy tas 15% ýokarlandy.
