Ilon Mask tarapyndan 2016-njy ýylda esaslandyrylan Neuralink kompaniýasy ABŞ-nyň Patentler we haryt nyşanlary edarasyna (USPTO) «Telepatiýa» (Telepathy), «Telekinez» (Telekinesis) we beýleki atlary geljekki önümlerinde ulanmaga hukuk almak maksady bilen ýüz tutdy diýip, «Forbes» neşiri habar berýär.
Maskyň ozal habar bermegine görä, Neuralink-iň ilkinji önümi «Telepatiýa» diýlip atlandyrylar we ol maýyplyk sebäpli hereket edip bilmeýän adamlara kompýuterleri ýa-da smartfonlary neýroimplant arkaly dolandyrmaga mümkinçilik berer. Emma 3-nji martda haryt nyşany üçin berlen arza, bu taslamanyň has giň gerimli maksatlarynyň bardygyny görkezýär.
Agzalan resminamada «Telepatiýa» atly enjam «habarlaşmagy we programma hem-de enjamlary dolandyrmagy ýeňilleşdirýän beýni-kompýuter interfeýsi» hökmünde häsiýetlendirilýär. Bu ýerde «habarlaşmagy ýeňilleşdirmek» diýen düşünje birden köp manyny aňladyp biler: daşarky enjamlary dolandyrmak bilen bir hatarda, implanty bolan adamlar bilen «gönüden-göni pikir alyşmaga-da» degişli bolup biler.
Häzirki wagtda çenli Neuralink kliniki synaglaryň ilkinji tapgyrynyň çäginde üç näsaga synag üçin neýroimplant ýerleşdirdi. Ilkinji gatnaşyjy 2024-nji ýylyň ýanwarynda operasiýa edilen Noland Arbo boldy. Häzirki synaglar maýyplara kömek bermäge gönükdirilen bolsa-da, Neuralink-iň geljekdäki meýilnamalarynyň has giň gerimlidigi aýdyň görnüp dur.
