Petrowas şäherinde (Çernogoriýa) 20 ýaşa çenli ýetginjekleriň arasynda küşt boýunça dünýä çempionaty tamamlandy. Bäsleşige 60-dan gowrak ýurtdan 255 sany iň güýçli ýaş küştçi gatnaşdy. Olar iki görnüşde – açyk (Open) we gyzlaryň arasynda iň güýçlini kesgitlemek üçin Şweýsar ulgamy boýunça 11 aýlawda ýaryşdylar. Açyk görnüşde 157, zenanlar toparynda bolsa 98 küştçi bäsleşdi.
"Türkmenistan: Altyn asyr" elektron neşiriniň habar bermegine görä, Türkmenistandan alty küştçi (üç oglan we üç gyz) gatnaşdy. Olaryň bäşisi FIDE görkezijisini ýokarlandyrdylar. Iň köp dereje görkezijisini Türkmenistanyň 2025-nji ýyldaky çempiony Wepaly Halnyýazow gazandy. Ol öňki 2157 utugynyň üstüne ýene 65 utuk goşdy. Serdar Baýramowy (2007+56) we Gülmira Seýilhanowany hem (1,939 +51) bellemek gerek.
Hindi grossmeýsteri Wenkateş Pranawyň (FIDE görkezijisi – 2615) 9 utuk bilen dünýä çempiony bolan açyk görnüşde türkmen küştçüleriniň arasynda iň gowy netijäni (5,5 utuk we 157-den 81-nji ýer) Amanmuhammet Hommadow görkezdi. Wepaly Halnyýazow 5 utuk, Serdar Baýramow bolsa 4 utuk toplady.
Zenanlar toparynda dünýä çempiony diýen ada 9 utuk gazanan 16 ýaşly russiýaly Anna Şuhman (FIDE görkezijisi – 2365) mynasyp boldy. Ýetginjekler dünýä çempionatyna ikinji gezek gatnaşan Läle Şöhradowa 5 utuk bilen 98 ýerden 66-njy ýeri eýeledi. Onuň jigisi Leýla Şöhradowa we Gülmira Seýilhanowanyň hersi 4,5 utuk toplap, ýaryşy, degişlilikde, 71-nji we 70-nji orunlary eýelemek bilen tamamladylar.
Türkmen küştçüleri geljekde başga-da birnäçe halkara ýaryşlara gatnaşarlar. Eýýäm aprel aýynda Merkezi Aziýanyň zolaklaýyn çempionatyna (Gazagystan), oglan-gyzlaryň arasynda rapid we blis boýunça dünýä çempionatyna (Gresiýa), Moskwa döwlet uniwersitetiniň Kubogyna we beýleki uly ýaryşlara gatnaşmak meýilleşdirilýär. Taýýarlyk üçin galan wagt – çäkli, şonuň üçin-de tälimçiler bu ýaryşlarda ýokary netijeleri gazanmak üçin has yhlasly işlemegi meýilleşdirýärler.
