Apple kompaniýasy iPhone, iPad we Mac-laryň interfeýsleri üçin uly täzelenmäni taýýarlaýar. «Bloomberg» neşiriniň žurnalisti Mark Gurmanyň habaryna görä, üýtgeşmeler ikonkalaryň stilini, menýulary, penjireleri we ulgam düwmelerini öz içine alar.
Çeşmeleriň maglumatlaryna görä, kompaniýa nawigasiýany ýönekeýleşdirmäge we dürli enjamlaryň interfeýslerini biri-birine meňzeş etmäge çalyşýar. Häzirki wagtda macOS, iOS we visionOS-yň dizaýn elementleri tapawutlanýar. Täze dizaýn esasan Vision Pro garyşyk hakykat garniturasy üçin döredilen programma üpjünçiligine esaslanýar.
Gurman meýilleşdirilýän täzelenmäni Apple-yň taryhyndaky iň uly üýtgeşmelerden biri hökmünde häsiýetlendirdi. Mac üçin bu Big Sur (2020) çykany bäri iň möhüm üýtgeşme bolar, iPhone üçin bolsa iOS 7 (2013) çykan gününden bäri iň uly täzelenme hasaplanýar.
Täze ulanyjy interfeýsiniň işlenip taýýarlanylmagyna Apple-yň interfeýs dizaýny boýunça wise-prezidenti Alan Daý ýolbaşçylyk edýär. Hut onuň ýolbaşçylygynda Apple Watch üçin operasion ulgam we iOS 7 döredilipdi.
Täzelenmäniň iýun aýynda geçiriljek Bütindünýä işläp düzüjiler konferensiýasynda (WWDC) tanyşdyrylmagyna garaşylýar. Üýtgeşmeler iOS 19, iPadOS 19 we macOS 16 operasion ulgamlaryna giriziler.
Apple kompaniýasy bu mesele boýunça düşündiriş bermekden saklandy.
