Sony ýapon tehnologiýa öndürijisi PlayStation 5 üçin çäkli möçberde öndüriljek täze DualSense oýun dolandyryjysyny hödürledi. Bu gezekki aýratyn görnüş meşhur «The Last of Us» (Biziňkilerden iň soňkusy) franşizasyna bagyşlandy.
Onuň dizaýny «Naughty Dog» studiýasy bilen bilelikde işlenip taýýarlanyldy. Bu dolandyryjy «The Last of Us» oýnunyň birinji hem-de ikinji bölümlerinden alnan nyşanlary hem öz içine alýan, ýalpyldaýan şekilleri özünde jemleýär.
Enjamyň ýüzünde «Ýaldyrawuk tomzajyklaryň» (Fireflies) nyşany, kebelegiň we möjegiň şekilleri ýerleşdirilipdir. Bu elementler Elli we Ebbiniň başdan geçiren möhüm wakalaryny alamatlandyrýar. Dolandyryjynyň esasy bölegi ýalpyldamaýan (mat) gara reňkde bolup, taýaklary, düwmeleri we triggerleri bolsa ak reňkde taýýarlanypdyr. Dolandyryjynyň arka tarapynda bolsa oýnuň ady ýazylan.
Täze DualSense-iň satuw çykyşy «The Last of Us Part II Remastered» oýnunyň kompýuter wersiýasynyň çykarylmagyna (3-nji aprel) we HBO-daky serialyň 2-nji möwsüminiň başlaýan gününe (13-nji aprel) gabat getirilýär.
Enjamyň bahasy 85 dollar, öňünden sargyt mümkinçiligi 14-nji martda elýeterli bolar. Satuwyna bolsa 10-njy aprelde başlanar.
