Nissan 1-nji aprelden başlap Makoto Utidanyň kompaniýasynyň baş direktory wezipesinden çekiljekdigini resmi taýdan habar berdi. Onuň ornuna kompaniýanyň häzirki meýilnamalaşdyryş boýunça müdiri Iwan Espinosa belleniler. Bu çözgüdiň Honda bilen birleşmek boýunça geçirilen çäreleriň netije bermändigi üçin, şeýle-de gepleşikleri täzeden dikeltmek umydy bilen kabul edilendigi aýdylýar.
Ozal «Financial Times» neşiri Honda-nyň bu gepleşiklere gaýtadan başlamaga taýyndygyny, emma munuň diňe Utidanyň wezipesinden çekilmeginden soň mümkin boljakdygyny mälim edipdi.
Bu soňky sekiz ýylyň dowamynda Nissan-yň dördünji ýolbaşçy çalşygy bolup durýar.
Geçen ýylyň dekabrynda Nissan, Honda we Mitsubishi özara düşünişmek hakynda memoranduma gol çekip, birleşmek üçin ilkinji ädimleri ädipdiler. 2025-nji ýylyň iýunyna çenli ähli şertler ylalaşylmaly, 2026-njy ýylyň awgustyna çenli bolsa umumy holding kompaniýasy döredilmeli diýlip meýilleşdirilipdi. Emma 13-nji fewralda taraplaryň arasyndaky düşünişmezlikler sebäpli gepleşikler togtadyldy.
Makoto Utida bilen bilelikde 1-nji aprelde ýene-de iki sany ýokary derejeli ýolbaşçy wezipelerinden çekiler: brendiň ösüşine we müşderileriň hyzmatyna jogapkär Asako Hosino hem-de strategiýa we korporatiw meseleleri utgaşdyrýan Hideaki Watanabe.
