Türkmenistanyň ýetginjekler hokkeý ýygyndysy 18 ýaşa çenli türgenleriň arasynda geçirilen Dünýä çempionatynyň III diwizionynyň “B” toparynda bürünç medal gazandy. Ýaryşlar Bangkog şäherinde (Tailand) alty ýygyndynyň gatnaşmagynda geçirildi.
Bu diwizion dereje taýdan ýedinjidir we bu ýerde 41-46-njy orunlar ugrunda bäsleşik geçirilýär.
Final tapgyrynyň öňüsyrasynda birinji orun we “A” toparyna çykmaga hukuk gazanmak ugrunda Tailand bilen Özbegistan bäsleşdi. Iki ýygyndy hem 12 utuk toplady. Duşuşyk özbek hokkeýçileriň 3:2 (1:1, 1:1, 1:0) hasabyndaky ýeňşi bilen tamamlandy.
Türkmenistan bürünç medal ugrunda Bosniýa we Gersegowina bilen güýç synanyşdy. Mundan öň türkmen türgenleri Lýuksemburgy (8:2) ýeňip, Tailanddan (3:4) we Özbegistana (2:8) ýeňlip, Günorta Afrika Respublikasyny (18:7) utdy.
Bosniýaly garşydaşlary bilen geçirilen oýun dartgynly geçdi. Iki gezek hasapda yzda bolan türkmen türgenleri üçünji döwde dört gol geçirip, ýeňiş gazandy. Netijede, 5:2 (1:1, 0:1, 4:0) hasaby bilen ýeňiş gazanyldy.
9 utuk bilen Türkmenistan üçünji orny eýeledi. Tailand (12 utuk) we Özbegistan (15 utuk) ilkinji iki orny paýlaşdy.
Türkmenistanyň ýetginjekler ýygyndysy 2026-njy ýylda hem “B” toparynda çykyş eder.
Türkmenistanyň ýygyndysynyň hüjümçisi Sultanhamyt Wahytow çempionatyň iň netijeli oýunçysy boldy. Ol 24 utuk (10 gol + 7 pas) toplap, iň köp netijeli görkeziji bilen tapawutlandy.
Ýygyndy Meýlis Kuliýewiň ýolbaşçylygynda, onuň kömekçileri Maksat Ataýew we Azatgeldi Bäşimowyň gatnaşmagynda bu ýaryşa taýýarlyk gördü.
