Hytaýyň “Neçža aždarhalaryň şasyny ýeňýär” (Нэчжа побеждает Царя драконов) multfilmi dünýä prokatynda 2 mlrd dollardan gowrak girdeji gazanan taryhda ilkinji animasion film boldy. Bu barada Variety neşiri habar berýär.
Multfilm dünýä prokatynda 2,06 mlrd dollar gazandy, şol bir wagtyň özünde onuň agramly bölegi içerki prokatyň paýyna düşýär ($2,04 mlrd).
Iň girdejili kino taslamalarynyň umumy reýtinginde “Neçža” multfilmi “Ar alyjylar: Bakylyk urşy” filminden (Мстители: Войну бесконечности, $2,05 mlrd) öňe geçip, altynjy orny eýeledi. Onuň bäşinji orunda ýerleşýän “Ýyldyz söweşleri: Güýjüň oýanmagy” filminiň (Звёздные войны: Пробуждение Силы, $2,07 mlrd) yzyndan ýetmegine-de az galdy.
“Neçža 2-niň” ýeke özi 2025-nji ýylda amerikan prokatynda ähli filmleriň gazananyndan ($1,14 mlrd) iki esse diýen ýaly köp gazandy. Bu taslamanyň býujetiniň bary-ýogy 80 mln dollardygyny göz öňünde tutsaň, ajaýyp netijedir.
Film hytaý halk döredijiliginden aždarhalara garşy göreşýän ýaş ýigit Neçžanyň başdangeçirmeleri barada gürrüň berýär.
Multfilmiň birinji bölümi 2019-njy ýylda çykdy we 20 mln dollar býujet bilen 742 mln dollar gazandy.
