Sürüjileriň tankydy belliklerinden soň, Volkswagen diňe sensorly düwmeler arkaly dolandyryş ideýasyny terk etmek kararyna geldi. Kompaniýanyň baş dizaýneri Andreas Mindt «Autocar» neşiri bilen geçiren söhbetdeşliginde, esasy funksiýalar üçin fiziki düwmeleriň täzeden giriziljekdigini aýtdy. Onuň pikirine görä, bu çözgüt ulagyň amatlylygyny we howpsuzlygyny ýokarlandyrar.
Täze üýtgeşmeler 2026-njy ýylda çykjak «ID.2all» modelinden başlap güýje girer. Indi ses derejesini, howanyň sazlamalaryny, wentilýatory we gyssagly duýduryş çyralaryny dolandyrmak üçin ekranyň aşagynda fiziki düwmeler bolar. Häzirki wagta çenli bu funksiýalar sensorly süýşürijiler we paneller bilen dolandyrylýardy.
«Bu telefon däl, ulag. Biz muňa düşündik» — diýip, Mindt nygtady. Ol kompaniýanyň «mundan beýläk şular ýaly ýalňyşlyk goýbermejekdigini» hem belläp geçdi.
Volkswagen bu karary müşderileriň islegine görä kabul etdi. Sürüjiler dolandyryşyň has amaly we aňsat bolmagyny talap etdiler.
Volkswagen fiziki düwmelere gaýdyp gelen ýeke-täk kompaniýa däl. Geçen ýyl Hyundai hem sürüjileriň nägileligi sebäpli, şol karara gelipdi.
