TSMC taýwan kompaniýasy ABŞ-daky ösen ýarymgeçiriji önümçiligi boýunça maýa goýumlaryny 165 milliard dollara çenli artdyrýar. «TrendForce» analitikleriniň çaklamasyna görä, bu ABŞ-na 2030-njy ýyla çenli dünýäniň ösen çip bazarynyň 22%-den gowragyna gözegçilik etmäge mümkinçilik berer.
Eger hemme zat meýilnama görä ýola goýulsa, 2030-njy ýyldan soň TSMC-niň ABŞ-daky üç sany täze zawodynyň gurluşygyna başlanar.
Önümçiligi giňeltmek baradaky karar birnäçe faktora baglydyr. Olaryň biri önümçiligiň diňe Taýwanda jemlenmegi bilen baglanyşykly geosyýasy töwekgelçilikleriň peseldilmegi bolup durýar. Mundan başga-da söwda söweşleriniň güýçlenmegi we gümrük paçlarynyň girizilmegi hem munda örän möhüm rol oýnady.
2021-nji ýylda Taýwan dünýäniň ösen çip bazarynyň 71%-ine gözegçilik edýärdi, ýöne TrendForce-yň çaklamasyna görä, 2030-njy ýyla çenli bu görkeziji ABŞ-da we Hytaýda önümçiligiň ösmegi sebäpli, 58%-e çenli pese gaçar.
Şeýle-de bolsa, ABŞ-da önümçiligiň has gymmat düşýändigi bellenilýär, bu bolsa çipleriň we şonuň bilen birlikde ahyrky önümleriň bahasynyň ýokarlanmagyna sebäp bolup biler. Häzirki wagtda, TSMC-niň täze maýa goýumlarynyň bazara bolan täsiri entek o diýen uly däl.
