Ýaponiýanyň Nagoýa uniwersitetiniň alymlary gök-bakja önümlerinde saklanýan lýuteoliniň saçyň çalarmak prosesini haýalladyp biljekdigini anyklady. Ylmy gözlegiň netijeleri Antioxidants žurnalynda neşir edildi.
Barlaghana syçanlarynda geçirilen tejribäniň dowamynda ylmy gözlegçiler lýuteolini iki usul bilen ulandy: agyz üsti bilen goýbermek we derä çalmak arkaly. Şeýle-de, alymlar syçanlarda başga iki maddany synagdan geçirdi: gesperidin we diosmetin. Ýöne hut lýuteolin has gowy netije görkezdi.
Bu maddany kabul eden syçanlarda çal saçlaryň göterimi 20% derejesinde galdy, gözegçilik toparynda bolsa ol 60-80%-e çenli ýokarlandy.
Lýuteoliniň täsir ediş mehanizmi öýjük aragatnaşygyna jogap berýän endotelinleriň öndürilmegi bilen baglanyşyklydyr. Bu saçyň reňkini gönüden-göni kesgitleýän melanositleriň işjeňligini saklamaga kömek edýär. Lýuteolin seldereý, brokkoli, ysmanak, burç, sogan we käşir ýaly gök-bakja önümleriniň düzüminde saklanýar.
Ylmy gözlegçiler geljekde lýuteoliniň saçyň çalarmagyna we beýleki ýaş üýtgeşmelerine garşy serişdeler üçin esas bolup biljekdigini çaklaýar.
“Lýuteoliniň garramaga garşy täsirleriniň kel galmak ýaly ýaş bilen baglanyşykly beýleki üýtgeşmelere degişlilikde ulanylyp bilinjekdigini öwrenmek gyzykly bolardy” – diýip, ylmy gözlegiň awtorlary belleýär.
