Braziliýanyň kazyýeti Apple kompaniýasyna 90 günüň dowamynda ýurtda iPhone üçin goşundylary (programmalary) App Store-den başga dükanlardan ýüklemek mümkinçiligini üpjün etmegi tabşyrdy. Kompaniýa ozal Ýewropada hem şular ýaly talaby ýerine ýetiripdi. Çünki Ýewropada «Sanly bazarlar hakynda kanun» (DMA) güýje giripdi diýip, «The Verge» neşiri belleýär.
«Apple eýýäm beýleki ýurtlarda şuňa meňzeş talaplary ýerine ýetirdi. Bu onuň ykdysady modeline düýpli täsir etmedi ýa-da düzedip bolmajak zyýan ýetirmedi» — diýlip, kazyýetiň kararynda aýdylýar.
Apple-a garşy derňew işleri 2022-nji ýylda Mercado Livre söwda platformasynyň şikaýaty esasynda başlapdy. Noýabr aýynda häkimiýetler kompaniýadan alternatiw töleg usullaryna we daşarky programmalary ýükläp almaga rugsat bermegini talap etdiler. Emma soň bu talap yzyna alyndy.
Apple bu karara garşy çykmagy meýilleşdirýär.
«Biz CADE-iň teklip eden wagtlaýyn çäreleriniň ulanyjylarymyzyň gizlinligine we howpsuzlygyna zyýan ýetirip biljekdiginden aladalanýarys. Şonuň üçin bu karara garşy çykmagy göz öňünde tutýarys» — diýip, kompaniýanyň metbugat wekili Fred Saýns aýtdy.
