Napoleona degişli Raýat kodeksiniň seýrek duş gelýän neşiri Fransiýada geçirilen auksionda satyldy. Bu barada Parižiň Tajan auksion öýi habar berdi.
Ilkibaşda lot 100-200 müň ýewro bolar diýlip çaklanyldy, ýöne soňky bahasy 395 müň ýewro (takmynan, 429,4 müň dollar) boldy.
“Birinji konsulyň belgisi bilen uly pergament kagyzynda çap edilen bu nusga hususy eýeçilikdäki ýeke-täk zatdyr. Ol fransuz imperiýasy ýykylansoň, bir maşgalada saklanyp galypdyr" – diýip, Tajanyň metbugat beýanatynda aýdylýar.
Kitap Parižiň etegindäki Sen-Klu galasynyň gözegçisi bolan Etýen Şarweniň maşgalasyna degişlidir. Napoleon ony 1814-nji ýylda Elba adasyna sürgün edilmezden ozal şol ýerde galdyrypdyr. Satylan nusga Napoleonyň Kodeksi ady bilen bellidir.
Bitewi raýat kodeksini işläp taýýarlamak işi Napoleonyň 1799-njy ýylda häkimiýet başyna gelenden soň esasy wezipeleriniň birine öwrüldi. Bu kanun 1804-nji ýylyň mart aýynda güýje girdi hem-de birnäçe üýtgetmeler we goşmaçalar bilen şu günki güne çenli Fransiýada hereket edýär.
