Apple kompaniýasy M4 Max we M3 Ultra çipleri bilen enjamlaşdyrylan täzelenen Mac Studio-ny hödürledi.
M3 Ultra çibi bir korpusda iki kremniýni birleşdirýär, şol sebäpden M4 Max bilen deňeşdirilende ep-esli güýçli. Şol bir wagtda onuň merkezi we grafiki prosessor arhitekturasy iň täzesi däldir.
Aslynda M3 Ultra – iki sany M3 Max çibiniň kremniý interpozýor arkaly birleşdirilen görnüşidir. Apple öň M1 Ultra we M2 Ultra-da hem şuňa meňzeş usuly ulanypdy. M3 Ultra-da ähli zat iki esse köpeldildi: 16 ýadro ýerine 32 hasaplaýyş ýadrosy, 40 ýadro ýerine 80 grafiki ýadro, 16 ýadro ýerine 32 Neural Engine (emeli aň prosessory) we ProRes wideo kodlamak üçin iki hereketlendiriji (öňki biriniň deregine).
Apple şeýle hem M3 Ultra üçin goşmaça mümkinçilikler girizdi. Ol indi Thunderbolt 5 interfeýsini (120 Gbit/sek) goldaýar, M3 Max bolsa diňe Thunderbolt 4 bilen çäklenýär. Mundan başga-da onuň iň ýokary goldaýan RAM-y (operatiw ýady) 128 GB-dan 512 GB-a çenli ýokarlandyryldy.
1 TB SSD ýatly enjamyň konfigurasiýasyny 2 TB, 4 TB, 8 TB ýa-da 16 TB çenli giňeltmek mümkin.
Täze Mac Studio üçin M4 Max çibi hem hödürlenildi. Ol 16-a çenli prosessor ýadrosyny, 40-a çenli grafiki ýadrony we 16 Neural Engine ýadrosyny hödürleýär. Apple-yň aýtmagyna görä, bu wersiýa M1 Max çibi bolan Mac Studio modelinden 3,5 esse çalt we Intel prosessorly iň güýçli 27 dýuýmly iMac-den 6,1 esse çalt işleýär.
M4 Max çibi bolan Mac Studio modeli 36 GB birleşdirilen ýat bilen gelýär, ýokary derejeli wersiýalary bolsa 128 GB RAM bilen üpjün edilip bilner. Onuň geçirijilik kuwwaty 410 GB/sek ýetýär. Içerki ýady bolsa 512 GB, 1 TB, 2 TB, 4 TB ýa-da 8 TB bolup biler. Enjam sekiz sany Pro Display XDR monitoryna doly 6K çözgütde şekil çykaryp bilýär.
Daşarky enjamlar bilen birikmek üçin: 10-gigabit Ethernet, HDMI 2.1, SDXC kart sloty, iki sany USB-A 3 (5 Gbit/sek çenli) porty, nauşnik girişi bar. Wi-Fi 6E-ni we Bluetooth 5.3-I goldaýar. Kiçi wersiýa iki sany USB-C (10 Gbit/sek çenli) port bilen gelýär, ýokary wersiýa bolsa dört sany Thunderbolt 5 (120 Gbit/sek çenli) port bilen enjamlaşdyrylan.
Bahalary:
- Mac Studio (M4 Max) – 1999 dollardan başlaýar;
- Mac Studio (M3 Ultra) – 3999 dollardan başlaýar.
Deslapky sargytlar eýýämden açyk. Satuwa 12-nji martda başlanar.
