Nýu-Jersidäki “Liberti” ylmy merkezinde “Titanige” bagyşlanan sergi geçirilýär. Onda myhmanlara üýtgeşik bir waka garaşýar – ekspozisiýanyň guramaçylary birinji derejeli ýolagçylaryň gäminiň heläkçiliginden öňki gijedäki soňky agşamlygynyň menýusyny gaýtadan dikelder diýip, The New York Times habar berýär.
Merkeziň müdiri Pol Hoffmanyň aýtmagyna görä, şol agşam menýuda konsome çorbasy, azatmahy, ördek, kepderi we dürli süýjülikler bardy. Agşamlyk nahary 4-5 sagat dowam edipdir.
Ähtimal, ýolagçylar aýsberg bilen çaknyşykdan sähel öň ýatmaga giden bolmaly.
1912-nji ýyldaky tagamlaryň asyl taýýarlaýyş usullary ýiten, şonuň üçin aşpezlik hünärmeni we telealypbaryjy Geýl Simmon tagamlary noldan döretdi. Sergide nahar paýlary az-owlak kiçi bolar we tagamlara gök önümler hem peýdaly goşundylar goşular.
Ahyrynda myhmanlar “Titanikde” aýsberg bilen çaknyşykdan soň orkestr tarapyndan çalnan kompozisiýanyň hormatyna Nearer, My God, to Thee (“Taňrym, saňa ýakyn”) adyny alan kokteýlden dadyp görer.
Sergide heläkçiligiň bolan ýerinde tapylan 5500 artefaktdan 100-den gowragyny, şol sanda altyn lýustrany we 1912-nji ýylyň 15-nji aprel gijesindäki maglumatlary görkezýän logometri (geçilen aralygy yzarlaýan gurluş) görmek bolýar.
