«Arkadag» futbol topary AFK-nyň Çagyryş ligasynyň çärýek final tapgyryndaky duşuşyklaryna ýeňiş bilen başlady. Ilkinji duşuşygynda klub myhmançylykda Hindistanyň üç gezek çempiony bolan «Ist Bengal» toparyny 1:0 hasabynda ýeňmegi başardy.
Kalkutta şäheriniň “Salt Lake” stadionynda geçirilen duşuşykda türkmen toparynyň ýeňiş goluny birinji ýarymyň başynda Ýazgylyç Gurbanow geçirdi.
Netijede, “Arkadag” topary dördünji resmi duşuşygynda üçünji ýeňşini gazandy. Topar ýaryşyň geçen ýylyň oktýabr-noýabr aýlarynyň sepgidinde geçirilen toparçalaýyn tapgyrynda Kuweýtiň “Al-Arabi”, Gyrgyz Respublikasynyň “Abdyş-Ata”, Maldiwleriň “Maziýa” toparlaryny yzda galdyryp, “B” toparçada birinji orny eýelemegi başarypdy.
“Ist Bengal” kluby 104 ýyllyk taryhynyň dowamynda Hindistanda üç gezek çempion bolmagy başardy. Milli we halkara derejede 180-den gowrak kubok gazanan klub “A” toparçany 7 utuk bilen birinji orunda tamamlapdy. Döredilenine iki ýyl bolan türkmen topary taryhy bir asyrdan hem geçýän garşydaşyny ýeňmegi başardy.
Türkmenistanyň çempiony jogap duşuşygyny 12-nji martda Arkadag şäherinde geçirer. Arkadag şäherindäki adybir stadionda geçiriljek duşuşykda ýurdumyzyň çempionyny deňme-deňlik hem kanagatlandyryp biler.
