Firefly Aerospace hususy aerokosmiki kompaniýasy Aýdaky Blue Ghost gonuş moduly tarapyndan düşürilen Günüň dogup gelýän suratyny paýlaşdy.
"Oýan-da, şöhle saç! Blue Ghost aý moduly Aýyň üstünde ilkinji gezek Günüň dogup gelşini surata düşürdi, bu bolsa Aý gününiň başlanandygyny görkezýär"-diýip, kompaniýa özüniň X sosial ulgamyndaky sahypasynda ýazdy.
Bu Blue Ghost-yň kosmos syýahatyndan iberen ilkinji suraty däl. 18-nji fewralda Blue Ghost Aýyň fonunda Ýer şaryny surata düşüripdi.
Bu modul Ýerdäki 14 güne barabar wagt, ýagny Aýyň arka tarapynda gije düşýänçä işlemegini dowam etdirer.
Blue Ghost Mission 1 hemranyň daşyndan üç aýlaw edenden soň, 2-nji martda Aýa üstünlikli gondy. Bu 2024-nji ýylyň fewral aýynda Intuitive Machines kompaniýasynyň amala aşyran IM-1 missiýasyndan soň, hususy modulyň ikinji üstünlikli gonuşydyr, ýöne şol gezekki missiýada modul gonuş wagtynda gapdallygyna düşmegi sebäpli, ylmy enjamlaryň işleýşini çäklendiripdi.
"Aýdaky bu kiçijik ädim täjirçilik barlaglarynda ägirt uly böküşi aňladýar" -diýip, Aýa ilkinji aýak basan amerikaly kosmonawt Nil Armstrongyň ganatly sözlere öwrülip giden jümlesini kompaniýada täzeçe aňlatma bilen aýtdylar.
Firefly Aerospace buraw synagy, regolit ýygnamak, radiasiýa durnukly hasaplamalar we Aý tozanyna garşy göreşmek üçin ylmy gurallary eltdi. Şeýle hem NASA kosmosyň howasynyň Ýere edýän täsiri barada täze maglumatlary almagy umyt edýär.
Şu wagta çenli Aýa diňe Russiýanyň, ABŞ-nyň, Hytaýyň, Hindistanyň we Ýaponiýanyň döwlet missiýalary üstünlikli gonupdy.
