Italiýanyň Rim şäherinde geçirilen BMG-niň Biodürlilik baradaky Konwensiýasynyň 16-njy mejlisinde (COP16) möhüm ylalaşyk gazanyldy. Mejlise gatnaşyjy döwletler tebigaty we biologik dürlüligi goramak maksady bilen, dünýä derejesindäki maksatlara ýetmek üçin, 2030-njy ýyla çenli, her ýyl azyndan 200 milliard dollar bölüp bermek boýunça ylalaşdylar.
«Associated Press» agentliginiň habaryna görä, bu möçber öň Monreal şäherindäki duşuşykda kabul edilen ylalaşyga laýyk gelýär. Meýilnama görä, ösüp barýan ýurtlaryň ekologik taslamalaryny maliýeleşdirmek üçin, 2025-nji ýylda 20 milliard dollar bölünip berler we bu mukdar 2030-njy ýyla çenli 30 milliard dollara ýetiriler.
Bu serişdeler BMG-niň Biodürlilik baradaky Ählumumy çarçuwaly maksatnamasyny durmuşa geçirmek üçin ulanylar. Maksatnamanyň esasy wezipesi – 2030-njy ýylyň ahyryna çenli, Ýeriň 30%-ni gorag astyna almak we zaýalanan ekoulgamlaryň 30%-ni dikeltmek. Maliýe serişdeleri dürli çeşmelerden – döwlet býujetlerinden, hususy maýa goýumlaryndan, haýyr-sahawat gaznalaryndan, halkara banklardan we innowasion maliýe gurallary arkaly ýygnalar.
Geçen hepde mejlise gatnaşyjylar «Kali gaznasyny» döretmek baradaky teklibi hem makulladylar. Bu gazna tebigy serişdelerden ykdysady peýda görýän pudaklaryň (mysal üçin, lukmançylyk we oba hojalygy) serişdeleriniň hasabyna, ekologik taslamalary maliýeleşdirmegiň täze ýollaryny işläp taýýarlamak bilen meşgullanar.
