Londonyň abraýly sebitinde 300 müň funt baha (takmynan, 312 müň ýewro) awtoduralga ýeri satylýar. Onuň bahasy Beýik Britaniýadaky ortaça jaýyň bahasyndan 40 müň funt gymmat. Bu mukdara täze “Ferrari” awtomobilini ýa-da üç kilogramdan gowrak altyn satyn alyp bolýar.
Gaýd-parkyň golaýynda ýerleşýän awtoduralganyň uzynlygy bäş metre we ini 2,3 metre barabar. Betonyň bir inedördül metriniň bahasy – 26 087 ýewro. Duralga bilen birlikde iki sütün, zynjyr we asfaltdaky bellik berilýär.
Baha haýran galdyryjy bolsa-da, şertnama “amatly” hasaplanýar. Çünki, Londonyň bu sebitinde ýaşaýyş jaýynyň ortaça bahasy 9,3 mln ýewro barabar. Awtoduralgadan 14,8 mln dollara satylýan üç otagly öýe pyýadalap barmak bolýar.
Alyjy awtoduralgany uzak möhletli kärende şertnamasy bilen 79 ýyllyk alyp biler. Şeýle-de bolsa, bu Londonda iň gymmat awtoduralga ýeri däl – Daily Mail neşiriniň maglumatlaryna görä, Çelsi sebitinde 495 000 funt baha bilen ýerasty garažda ýer satuwa çykaryldy.
