2025-nji ýylyň 20-nji oktýabrynda Londonyň «Troubadour Canary Wharf» teatrynda «Açlyk oýunlary: Sahnada» atly sahna oýnunyň premýerasy bolar. Sahna oýny Sýuzen Kollinziň meşhur trilogiýasynyň ilkinji romany we filmi esasynda, Konor Makferson tarapyndan sahna üçin ýörite uýgunlaşdyryldy. Sahna oýnunyň režissýory hökmünde Metýu Danster çykyş eder diýip, «Deadline» neşiri habar berýär.
Premýera Londonyň maliýe sebitinde ýerleşýän 1200 tomaşaçy üçin niýetlenen täze teatrda geçiriler. Sahna oýnuny Runaway Entertainment kompaniýasy Lionsgate bilen hyzmatdaşlykda gurnaýar. Onuň prodýuserleri Oliwer Roýds, Tristan Beýker we Çarli Parsons.
«Men diýseň begenýän, sebäbi „Açlyk oýunlary“ Konor Makferson ýaly zehinli dramaturgyň we tejribeli režissýor Metýu Dansteriň elinde» — diýip, eserleriň awtory Sýuzan Kollinz dramaturg bilen režissýoryň saýlanmagy bilen kanagatlanýandygyny aýtdy.
Bu sahna oýny Kollinziň täze romany esasynda taýýarlanylýan, «Açlyk oýunlarynyň» täze prikweliniň çykyşyna gabat getiriler. Täze roman 2025-nji ýylyň mart aýynda çap ediler, filmiň premýerasy bolsa 2026-njy ýylyň noýabr aýyna meýilleşdirilýär.
«Açlyk oýunlary» franşizasy bütin dünýäde 100 milliondan gowrak nusgada kitap satdy we 52 dile terjime edildi. Franşizanyň filmleri bolsa dünýä boýunça 3,4 milliard dollardan gowrak girdeji gazandy.
