Microsoft korporasiýasy Windows operasion ulgamy üçin mahabatly mugt Office programmalar toplumyny synagdan geçirip başlady. Bu barada «Beebom» neşiri habar berýär.
Häzirki wagtda bu mugt programma üpjünçiligi diňe käbir ýurtlarda elýeterli. Käbir ulanyjylarda, Microsoft Store arkaly «Microsoft 365» abunalygyny satyn almak zerurlygy bolmazdan, mugt Office toplumyny ýükläp biljekdikleri barada bildiriş peýda bolýar. Emma Word, Excel, PowerPoint we beýleki elýeterli programmalar ulanylýan mahaly, ekranda mahabat bannerleri we 15 sekuntlyk wideorolikler görkezilýär.
Microsoft "Office" toplumynyň täze wersiýasy barada ozalky teswirinde korporasiýanyň mahabatly wersiýany çykarmak boýunça meýilnamasynyň ýokdugyny mälim edipdi. Muňa garamazdan, dürli ýurtlarda geçirilýän synaglardan soň, täze toplumyň ähli ulanyjylar üçin doly neşir edilmegi boýunça karar kabul edilip bilner.
