2024-nji ýylyň ahyryndan bäri, Tesla kompaniýasynyň paýnamalarynyň bahasy, takmynan, 40% aşak gaçdy diýip, «Bloomberg» neşiri habar berýär. Soňky günlerde bu pese gaçyş has-da çaltlaşdy. Kompaniýanyň Ýewropadaky satuwlarynyň tas iki esse diýen ýaly azalandygy we dördünji çärýekdäki görkezijileriniň gowşak bolandygy baradaky habarlaryň ýaýramagy maýadarlary alada goýdy.
Şu hepde paýnamalaryň bahasynyň 17% aşak gaçmagy, treýderleriň (söwdagärleriň) howsala düşýändigini görkezýär.
«Tesla ýaly gymmat bahalandyrylýan islendik paýnama bilen bagly hakyky kynçylyk, onuň iň pes derejesini kesgitlemegi başarmakdyr. Paýnamalaryň pes nokatlary, köplenç adaty görkezijilerden has köp maýadarlaryň keýpine bagly bolýar» — diýip, Interactive Brokers kompaniýasynyň baş strategi Stiw Sosnik belleýär.
Hakykatdanam, Tesla-nyň girdejä bolan bahalandyryş koeffisiýenti – 92. Bu görkeziji S&P 500 indeksiniň ortaça görkezijisinden (21) we şonuň ýaly-da beýleki iri kompaniýalaryň görkezijisinden (28) birnäçe esse ýokary.
Tesla-nyň kynçylyklary bu ýyl has-da artdy. ABŞ-nyň prezident saýlawlaryndan soň kompaniýanyň paýnamalary ýokarlandy. Sebäbi köp adam Ilon Maskyň Donald Tramp bilen ýakyn gatnaşykda bolup, oňa peýda getirjekdigini çaklapdy. Emma kompaniýa soňky on ýyllykda ilkinji gezek ýyllyk satuwlarynyň peselendigini we ýanwar aýynda satuwlaryň netijesiniň oňyn bolmandygyny yglan edensoň, maýadarlar ynamyny ýitirip başlady. Şeýle-de kompaniýanyň girdeji hasabaty, çärýeklik girdejiniň garaşylandan has pes bolandygyny görkezdi. Şondan soň Tesla 2025-nji ýyl üçin satuw baradaky çaklamalaryny hem peseltdi.
Kompaniýanyň bazardaky gymmaty 1 trillion dollardan aşak gaçdy we iň gymmat amerikan kompaniýalarynyň sanawynda Berkshire Hathaway hem-de Broadcom-dan yzda galdy. Ilon Maskyň syýasata aşa köp üns bermegi hem maýadarlary aladalandyrýar – köp adam onuň öz işine has köp üns bermegini isleýär.
Häzirlikçe ösüş üçin oňyn faktorlara garaşylmaýar. Analitikler sürüjisiz awtoulag tehnologiýasy boýunça uly ösüşleriň bolmagyna garaşmaýarlar. Şeýle-de opsiýa bazary «aýy» (pessimist, aşak gaçyş) ýagdaýynyň bardygyny görkezýär. Penşenbe güni paýnamalar 3% pese gaçyp, olaryň bahsy 280 dollar boldy. Emma anna güni premarket söwdasynda az-kem ýokarlanyp, 0.4% ösdi. S&P 500 indeksindäki umumy pese gaçyş bilen bilelikde, maýadarlar täze «sarsgynlara» taýynlyk görýärler.
