OpenAI amerikan kompaniýasy täze emeli aň (EA) modelini – GPT-4.5-i hödürledi. Bu barada 27-nji fewralda kompaniýanyň resmi blogunda habar berildi.
OpenAI-yň bellemegine görä, täze model ulanyjylaryň kiçijek yşaratlaryny hem has gowy duýýar we olara has takyk jogap berýär. Şeýle hem ol tekst ýazmak we programmirlemek üçin has peýdaly. Kompaniýa öňki wersiýalara garanyňda, GPT-4.5-iň has az ýalňyşmagyna garaşýar.
Kompaniýanyň içinde «Orion» ady bilen tanalýan, täze modeliň deslapky wersiýasy, häzirlikçe diňe çäkli işläp düzüjilere we «ChatGPT Pro» abunalygyna ýazylan ulanyjylara elýeterli edildi.
OpenAI-yň gözleg boýunça wise-prezidenti Nik Raýder «Bloomberg» neşirine beren interwýusynda, täze modeliň mümkinçilikleriniň häzirki iň güýçli model bilen deňeşdirilende, GPT-3.5-den GPT-4-e geçişdäki ýaly ep-esli ýokarlanjakdygyny aýtdy.
«Orion» modeliniň işläp düzülýän döwründe, OpenAI birnäçe kynçylyk bilen ýüzbe-ýüz boldy diýip, «Bloomberg» neşiri 2024-nji ýylda habar beripdi. Maglumatlara görä, «Orion» käbir programmirleme meselelerini çözüp bilmän galypdyr, sebäbi ol şol ugurlar boýunça ýörite türgenleşdirilmändir. Ýatlatsak, kompaniýa has kämil EA ulgamlaryny işläp düzmek üçin täze, ýokary hilli we ozal ulanylmadyk okuw maglumatlaryny tapmak meselesi bilen hem ýüzbe-ýüz bolupdy.
