OnePlus kompaniýasy Watch 3 akylly sagatlarynyň eýelerine korpusyndaky ýalňyş sebäpli gajetlerini çalyşmagy teklip etdi. Sagatlaryň yzky gapagyndaky “Made in China” (Hytaýda öndürilen) ýazgysyna derek ýalňyşly jümle “Meda in China” ýazyldy. Bu baradaky maglumat sosial ulgamlarda derrew ýaýrady.
Kompaniýa ýalňyşlygy boýun aldy, ýöne şeýle gurluşlaryň örän çäkli çykarylandygyny belledi.
“Ýalňyş gözden sypyp, siziň täze OnePlus Watch 3 sagatlaryňyza düşüpdir. Alada etmäň, bu asla tötänleýin boldy” – diýip, brend belledi. Şol bir wagtyň özünde, şeýle ýalňyş bilen näçe sagadyň çykarylandygy anyklaşdyrylmaýar.
Bu ýalňyşlyk hatda sagatlaryň resmi suratlarynda-da peýda boldy, ýöne internetdäki çekişmelerden soň kompaniýa olary aýyrdy.
“Käbir ulanyjylar bu ýalňyşyň üstünden güldi. Eger bu bulam-bujarlyk sagatlaryň diňe bir toplumyna täsir etse, ol derrew kolleksiýa önümine öwrüler. Ýöne käbir ulanyjylar ýalňyşlygyň hil gözegçiliginiň deňinden geçendigine lapykeç boldy. Her niçigem bolsa, hemmä ýaranyp bolmaýar” – diýip, Android Police ýazýar.
2018-nji ýylda şeýle ýagdaý bilen Asos kompaniýasy ýüzbe-ýüz boldy. Ýalňyşly (online sözüniň deregine, onilne diýlip ýazylan) 17 müň firma pakedini çykarmak bilen, kompaniýa munuň “çäkli kolleksiýadygyny” aýdyp, olary yzyna gaýtarjak hem bolmady.
