2025-nji ýylda Toyota kompaniýasy Land Cruiser hatarynda täze ykjam ulagyny çykarar. Ol çarçuwaly, doly herekete getirijili bolup, Suzuki Jimny-nyň bäsdeşine öwrüler. Onuň bahasynyň, takmynan, 28,2 müň dollar bolmagyna garaşylýar.
Öň model elektrik bolar diýlip çaklanypdy, ýöne Toyota benzin hereketlendirijisini hödürlemek kararyna geldi. Ähtimal, dizel wersiýasy hem hödürlener. Awtomobil Hilux üçin işlenip düzülen IMV 0 platformasyna esaslanyp bilner. Onuň uzynlygy Toyota Corolla Cross ýaly 4,5 metr töweregi bolar.
Land Cruiser FJ-niň 2025-nji ýylyň güýzünde hödürlenmegine garaşylýar, satuw 2026-njy ýylda başlar. Ýaponiýada onuň bahasy birneme arzan bolar – takmynan, 4 mln ýena ($26 800). Häzirlikçe bu ulagyň haýsy ýurtlarda elýeterli boljakdygy belli däl.
Toyota ykjam, şol bir wagtyň özünde adaty çarçuwa gurluşly doly derejeli ulag bilen alyjylaryň ünsüni çekmek isleýär.
