«Jeýms Bond» franşizasyna degişli filmleri we seriallary indi Amazon çykarar diýip, «Variety» neşiri habar berýär, Franşiza boýunça hukuk üç tarapa degişli bolar: Amazon, prodýuserler Maýkl J. Uilson we Barbara Brokkoli. Emma döredijilik gözegçiligi Amazon-a degişli bolar.
«Jeýms Bond ilkinji gezek kinoda peýda bolaly bäri, 60 ýyldan gowrak wagt geçdi. Emma ol henizem güýmenjeler dünýäsi üçin iň meşhur we özboluşly keşpleriň biri bolmagynda galýar» – diýip, Prime Video we Amazon MGM Studios-yň ýolbaşçysy Maýk Hopkins aýtdy.
Ýatlatsak, Amazon 2022-nji ýylda MGM kinostudiýasyny ähli taslamalary bilen bilelikde satyn alypdy. Şonda kompaniýa «Jeýms Bonduň» ähli taslamalarynyň distribusiýa hukuklaryna eýe bolupdy. Indi bolsa franşizanyň döredijilik gözegçiligi hem kompaniýanyň elinde bolar.
Deniel Kreýg 007-niň keşbini bäşinji hem-de soňky gezek «Ölmegiň wagty däl» (Не время умирать) atly 25-nji «Jeýms Bond» filminde ýerine ýetirdi. Bu film 2021-nji ýylda prokata çykyp, 775 million dollar girdeji gazanypdy. Şondan bäri metbugatda gaty köp çaklamalar ýaýrady, emma nobatdaky filmleriň surata düşüriliş senesi ýa-da Kreýgiň ornuny tutjak aktýor barada hiç hili resmi maglumat berilmedi.
