Volvo kompaniýasy kuwwatly Nvidia Drive AGX Orin hasaplaýyş ulgamy bilen ES90 elektrosedanyny anons etdi. Bu çip sekuntda 508 trillion amaly gaýtadan işlemäge ukyply bolup, awtomobiliň howpsuzlygyny we dolandyryşyny kämilleşdirmäge mümkinçilik berýär diýip, The Verge habar berýär.
Çip Superset tehnologiýa platformasynyň bir bölegi bolar, kompaniýanyň geljekki modelleri hut bu tehnologiýa esaslanar.
Orin ulgamy öň meýilleşdirilen Xavier çibiniň ornuny çalşar, çünki hasaplaýyş ýüküniň artmagy has ýokary kuwwaty talap edýärdi. Volvo munuň “maşyn biliminiň algoritmlerini kämilleşdirmäge we neýroulgamlar tarapyndan işlenýän maglumatlaryň möçberini 40 milliondan 200 million parametre çenli artdyrmaga” kömek etjekdigini belleýär.
Superset platformasy awtomobile programma üpjünçiliginiň simsiz täzelenmelerini almaga mümkinçilik berer.
“Volvo ES90 häzirki günde bazarda tehniki taýdan iň ösen awtomobilleriň biri bolup, ol wagtyň geçmegi bilen kämilleşdirmek üçin döredildi” – diýip, Volvo-nyň baş inženeri Anders Bell belleýär.
ES90 kompaniýanyň EX90-dan soň SPA2 arhitekturasyna esaslanýan ikinji awtomobili bolar. Kompaniýa öňki modelleriň ýetmezçiliklerini göz öňünde tutdy we indi täze ulagy köpçülige hödürlemäge taýýar.
